A xornada 'Mulleres no sector da construción' de Fundación Laboral e Cruz Vermella amosa as opcións laborais e de conciliación da industria
Un gupo de mulleres desempregadas puideron escoitar e charlar con Elena del Pozo, traballadora do sector, que lles contou a súa experiencia así como con Beatriz Fernández e Pablo Silveira, integrantes do departamento de Recursos Humanos de Prace, que repasaron os estereotipos asociados ao sector para derrubalos e tumbar a idea de que as mulleres non poden traballar en construción.
![Ana Ruzo, asesora de formación de FLC Galicia, no centro, e as integrantes de Cruz Vermella Santiago,
Olalla Maquieira (dereita) e Susana Balseiro (esquerda).](/uploads/gallery/images/ARCH667e8d742375a.jpeg)
- Ana Ruzo, asesora de formación de FLC Galicia, no centro, e as integrantes de Cruz Vermella Santiago, Olalla Maquieira (dereita) e Susana Balseiro (esquerda).
- Asistentes á xornada Mulleres en construción.
- Elena del Pozo, traballadora do sector, á dereita, e Lucía Veleiro, orientadora laboral de FLC Galicia.
- Beatriz Fernández de Prace, de pé expoñendo, e Pablo Silveira de Prace, na mesa.
- Os/as fillos/as das participantes probaron a ferramenta de Realidade Virtual da FLC.
- Os/as cativos/as puideron desfrutar de actividades mentres as súas nais asistía ás xornadas.
Oportunidades laborais e medidas para conciliar. É a mensaxe que se transmitiu onte ás participantes na xornada Mulleres no sector da construción, organizada en colaboración entre Fundación Laboral de la Construcción de Galicia e Cruz Vermella en Santiago.
A actividade, incluída no proxecto Puentes por la Igualdad en el Empleo Plus de Cruz Roja, reuniu na sede da entidade paritaria en Compostela a un grupo de mulleres desempregadas -algunhas acompañadas dos seus/súas fillos/as- que puideron escoitar e charlar con Elena del Pozo, traballadora do sector, e descubrir oportunidades laborais en construción da man de Beatriz Fernández e Pablo Silveira, integrantes do departamento de Recursos Humanos da empresa Prace.
Elena del Pozo: "Formación, boa actitude e iniciativa son claves"
Elena contou a súa experiencia, polo de agora, curta no sector xa que só leva tres meses traballando no sector. "Era autónoma e, despois de pechar o meu negocio, decidín formarme en construción que era o que me gustaba", explicou Elena, que foi participante do Plan de Emprego de Cruz Vermella formándose como operaria de carretillas elevadoras e manipulación de alimentos.
Tras unha entrevista de orientación laboral, apuntouse ao curso de Operacións auxiliares de revestimentos continuos en construción no Centro de Santiago de Fundación Laboral de la Construcción de Galicia e, pouco despois, empezou a traballar na firma Técnicas Constructivas de Ocio Galicia, especializada en construción de piscinas.
"Todos e todas temos cabida en construción porque fai falta relevo xeracional. Ademais, nunca é tarde para empezar: eu teño 45 anos e estou súper contenta na empresa", asegurou. A súa experiencia está a resultar moi positiva. "Nunca vin ningunha falta de respecto, eu sempre pregunto como se fan as cousas e iso axúdache a medrar na obra. Ademais, podo conciliar xa que traballo ata as 5 da tarde", explicou Elena que se ve no sector a longo prazo. "Gustaríame seguir traballando nesta empresa porque nos coida igual de ben tanto ao que leva 30 anos coma a min que só levo tres meses". E animou ás participantes na xornada a unirse ao sector combinando "formación, boa actitude e iniciativa".
Derrubando estereotipos dende as empresas do sector
Beatriz Fernández e Pablo Silveira, integrantes do departamento de Recursos Humanos de Prace, repasaron os estereotipos asociados ao sector -como inestabilidade laboral, oficio duro e difícil, traballo mal pagado, sector contaminante e pouco cualificado- para derrubalos e tumbar a idea de que as mulleres non poden traballar en construción.
Beatriz Fernández comentou as medidas de conciliación que a empresa pon a disposición de todos/as seus/súas traballadores/as. "Somos unha empresa familiarmente responsable e gústanos que a xente que traballa con nós poida conciliar", explicou e alentou ás mulleres presentes na xornada a perderlle o medo ao sector. "Cando entrevistamos a xente para traballar, sobre todo, buscamos ganas, compromiso e dedicación, é o principal para poder traballar no sector", indiciu a técnica de Recursos Humanos de Prace.
Os/as fillos das participantes que asistiron á xornada puideron descubrir unha ferramenta de Realidade Virtual que se emprega para formar en Prevención de Riscos Laborais en obra dende a Fundación Laboral de la Construcción.